Pasakaan sang kaso subong nga adlaw sa Iloilo Provincial Prosecutor’s Office ang mga sakay sa fishing boat nga nadakpan sa akto sang Iloilo Provincial Bantay Dagat Task Force nga illegal nga nagpangisda malapit sa isla sang Bulubadiangan, Brgy. Polopina sakop sang banwa sang Concepcion, Iloilo kahapon.
Tatlo sa nagkaladakpan pumuluyo sang Barangay Guinticgan, samtang ang duha ka mga kaupod nila lunsay pumuluyo sang Barangay Buenavista, Carles, Iloilo.
Nadakpan ang mga ini sang gintingob nga pwersa sang Iloilo Provincial Bantay Dagat Task Force kag Concepcion Municipal Police Station. Suno kay PSSG Roderick Asturias, team leader sang Iloilo Provincial Bantay Dagat Task Force, samtang nagahimo sila sang seaborne patrol operation sa kalalawran sang Concepcion, naaktuhan gid nila ang nasambit nga mga mangingisda nga nag-usar sang dinamita bilang pamaagi sa ila pagpangisda.
Napaidalom sa kustodiya sang Iloilo Provincial Bantay Dagat Task Force ang nakumpiskar nga mga items nga gingamit sang mga suspetsado katulad sang air compressor, hose, diving clippers, goggles kalakip ang nagkalain-lain nga sahi sang isda nga nakuha pinaagi sa dynamite fishing. Pagagamiton nga ebidensya ang mga confiscated items sa kaso nga ipasaka batok sa mga suspetsado.
Hugot nga ginadumilian sang Fisheries Code of the Philippines ang Dynamite Fishing bangod sang halit nga matuga sini sa aton dunang manggad. Ginaprohibir ini nga metodo bangod ginaguba sini ang elestaran sang isda kag masangkad nga corals sang Visayan Sea nga ginakabig sa karon nga isa sa pinakabugana nga kuluhaan sang isda sa pungsod.
Mabaskog nga nagapaandam si Governor Arthur Defensor Jr. sa kutob sa nagahimo sang illegal nga fishing practice bangod padayon nga mabinantayon kag aktibo ang Provincial Bantay Dagat Task Force sa pagdakop sa nagahimo sang sala nga pamaagi sa pagpangisda sa nasakpan nga kalalawran sang probinsya sang Iloilo.
(Capitol News)
#BalitaHalinSaKapitolyo